د عامې روغتیا وزارت د سترګو درملنې ګرځنده روغتیايي ټیمونو خبرتیا!
ټاکل شوې د عامې روغتیا وزارت د سترګو درملنې ګرځنده روغتیايي ټیمونه، له ۲۲/۶/۱۴۰۴ نېټې څخه تر ۲۲/۷/۱۴۰۴ نېټې پورې کندهار ولایت ته سفر وکړي او د کندهار ولایت په میرویس سیمه ییز روغتون کې اړمنو کسانو ته د سترګو درملنې خدمات وړاندې کړي، چې په دې خدماتو کې ۴۰۰ تنو ته د سترګو د کترکت پردې عملیات ترسره کول، ۷۰۰ تنو ته د نږدې لید عینکو ویش او یو شمېر ناروغانو ته چې شمېر یې له ۶۰۰۰ څخه تر ۷۰۰۰ تنو رسېږي، درملنه او ورته د اړینو درمل ویش شامل دي.
په همدې اساس، هغه هېوادوال چې په کندهار ولایت کې ژوند کوي او د سترګو ناروغۍ ولري، خبر ورکول کېږي؛ چې په پورته ذکر شوې نېټه د کندهار ولایت میرویس سیمه ییز روغتون ته مراجعه وکړي او د ګرځنده روغتیايي ټیمونو له لوري د وړاندې کېدونکو روغتیايي خدماتو څخه برخمن شي.
