د غور ولایت تیوره ولسوالۍ په یخن سفلي کلي کې یو فرعي روغتیايي مرکز پرانیستل شو
دا فرعي روغتیايي مرکز د یو لړ مراسمو په ترڅ کې د غور ولایت د عامې روغتیا رئیس، مولوي عبدالواحد حماس، د دې ادارې د کارکوونکو، د روغتیا سیمه ییزې شورا استازو، قومي مشرانو او د سیمې اوسېدونکو په شتون کې په رسمي توګه پرانیستل شو.
یاد روغتیايي مرکز د دې ولسوالۍ د یو اوسېدونکي له لوري د څه باندې یو میلیون افغانیو په شخصي لګښت جوړ شوی، چې د یوې مجهزې ودانۍ، تشخیصیه خونې، درملتون او د ناروغانو د استراحت خونې درلودونکی دی او په یو شمېر نورو اړینو وسایلو هم سمبال دی.
د غور ولایت د عامې روغتیا رئیس، د دې غوره اقدام ستاینه وکړه او دا یې د یووالي، د ټولنیز مسؤلیت احساس او د حکومت سره د خلکو مستقیمې همکارۍ یوه بېلګه وبلله.
د عامې روغتیا رئیس زیاته کړه، دا چې غور ولایت د خپل جغرافیایي موقعیت، د اسانتیاوو نشتوالي او د هېواد له مرکز څخه د واټن له امله له روغتیايي ننګونو سره مخ دی، نو په داسې حالت کې د روغتیايي مرکزونو په جوړولو او پیاوړتیا کې د خلکو رول خورا حیاتي دی او موږ د داسې خیریه اقداماتو هرکلی کوو او په دې برخه کې تخنیکي او نظارتي ملاتړ ته ژمن یو.
