تېره یوه میاشت کې د عامې روغتیا وزارت د چاپیریال روغتیا ریاست له لوري د کابل ښار په بېلابېلو ناحیو کې د کولرا ناروغۍ د مخنيوي په موخه د عامه پوهاوي کمپاين ترسره شو
دغه کمپاين په ښوونځیو او وړکتونونو کې د کولرا ناروغۍ د مخنيوي په موخه ترسره شو، چې په ترڅ کې یې څه باندې ۳۰زره تنه ښوونکو او زدهکوونکو ته د کولرا ناروغۍ د مخنيوي په موخه روغتيايي لارښوونې او معلومات ورکړل شول او د روغتيايي لارښوونو او معلوماتو ۳۱زره تبلیغاتي پاڼې د ښوونځیو او وړکتونونو په مناسبو ځایونو کې نصب او زده کوونکو ته ووېشل شوې؛ څو د یادې ناروغۍ د خپرېدو مخه ونیول شي او د زدهکوونکو روغتیا خوندي شي.
دغه راز، د چاپیریال روغتیا ریاست مسؤلینو له لوري په بېلابېلو مکتبونو او وړکتونونو کې ښوونکو او کارکوونکو ته د حفظ الصحې مراعتولو او روغتيايي کارتونو اخيستلو په موخه لازمې سپارښتنې وشوې؛ ترڅو زدهکوونکو ته له ناروغیو څخه د یو خوندي تعلیمي چاپیریال زمینه برابره شي.
