د ا.ا.ا د عامې روغتیا وزیر، ښاغلي مولوي نور جلال جلالي سعودي عربستان ته د خپل رسمي سفر په جریان کې د ریاض حطین سیمې له بنسټیز روغتیايي مرکز څخه لیدنه وکړه
د عامې روغتیا وزیر، د دې لیدنې پر مهال د یاد روغتیايي مرکز له اداري او تخنیکي کارکوونکو سره خبرې وکړې او د دې مرکز د وقایوي، معالجوي او تشخیصیه خدماتو د نوعیت په اړه یې له روغتیايي کارکوونکو څخه معلومات تر لاسه کړل.
د عامې روغتیا وزیر وویل: (موږ له اوږدې مودې وروسته په هېواد کې د لومړي ځل لپاره د خپلو لومړنیو او ثانوي خدماتو ریفورم پیل کړی؛ تر څو د ولسوالیو په کچه پیاوړی روغتیایي سیسټم رامنځته کړو او د ګاونډیو او سیمه ییزو هېوادونو روغتیایي سیسټمونه او د دوی د روغتیایي خدمتونو د موثریت، معلوماتو ارزونې او تحلیل وروسته په خپلو لومړنیو او ثانوي خدماتو ښه والي او پرمختګ کې ترې اغېزمنه ګټه پورته کړو؛ تر څو وکولای شو د ناروغیو د خپرېدو حالت او د نفوس د شمېر او بدلونونو په پام کې نیولو سره د خلکو د اړتیاوو سره سم عصري او اغېزمن روغتیايي خدمتونه برابر کړو).
ښاغلي وزیر زیاته کړه، د روغتیا برخه کې د عصري ټکنالوژۍ له امله ډېر بدلونونه او نوښتونه رامنځته شوي چې په دې برخه کې د عامې روغتیا وزارت خپلې کړنې جاري ساتي ، ښاغلي وزیر وویل ، د دې تجربو او معلوماتو په شريکولو سره به وتوانیږو، د هېواد روغتيايي نظام د اوسنیو اړتیاوو او غوښتنو سره سم تنظيم کړو، چې پایله کې به یې د ناروغیو مخنیوی، کنټرول او پر وخت درملنه تر سره کېږي.
