د عامې روغتیا د پالیسۍ مرستیال د بامیان والي سره د روغتیايي خدمتونو د پراختیا په تړاو وکتل
د ا.ا.ا د عامې روغتیا وزارت د روغتیايي پراختیا او پالیسۍ مرستیال، ښاغلي ډاکټر محمد حسن غیاثي بامیان ولایت ته د سفر په ترڅ کې د دغه ولايت له والي، الحاج مولوي عبدالله سرحدي سره ليدنه وکړه
په دې لیدنه کې د روغتيايي پراختيا او پاليسۍ مرستیال، د خپل سفر اساسي موخې، چې په کې د روغتیايي خدمتونو د کیفیت ارزونه، د يو شمېر نويو څانګو پرانيستې او د هېوادوالو اړتیاوو او غوښتنو ته رسېدنه وه، له والي سره شریکې کړې.
ښاغلي مرستیال وویل: (د دې لپاره چې د هېواد ټول اوسېدونکي له روغتیايي خدمتونو څخه برخمن شي، د د عامې روغتيا وزارت له لوري د روغتيايي خدمتونو د پراختيا لړۍ پيل شوی او په همدې موخه د هېواد په ۳۱۸ ولسوالیو کې د ولسوالۍ په کچه د عمومي روغتونونو د جوړېدو چارې روانې دي، چې بامیان ولایت هم د دې ملي برنامې برخه ده او د دې ولایت په څو ولسوالیو کې د عمومي روغتونونو د جوړېدو قراردادونه ساختماني شرکتونه ته ورکول شوي دي).
دغه راز، د باميان والي، ښاغلي مرستیال ته ښه راغلاست ووايه او د عامې روغتیا وزارت له رهبرۍ یې مننه وکړه، چې د دغه ولایت د روغتیايي وضعیت ښه والي لپاره عملي ګامونه اخلي، نوموړي د روغتيا برخه کې د دوامداره همکارۍ او همغږۍ ډاډ څرګند کړ.
