د عامې روغتیا وزارت د پوهاند غضنفر روغتیایي علومو انسټيټیوټ د طبي ټکنالوژۍ څانګې څخه ۲۰ تنه زده کړیالان فارغ شول
په همدې موخه جوړو شویو مراسمو کې د پوهان غضنفر روغتیایي علومو انسټيټیوټ رئیس دوکتور محمد قاسم عادل، د بېلابېلو څانګو مسؤلینو او استادانو ګډون کړی و.
د پوهاند غضنفر روغتیایي علومو انسټيټیوټ رئیس، دوکتور محمد قاسم عادل فارغانو ته د فراغت مبارکي ورکړه او له هغوی څخه یې وغوښتل، چې خپلې دندې په اخلاص، امانتدارۍ او د مسؤلیت له احساس سره سمې ترسره او هم دې د طبابت اخلاق په عمل کې پلي کړي.
همدارنګه، د انسټیټیوټ علمي مرستیال ډاکټر عبدالستار جبارزي فارغانو ته د فراغت مبارکۍ ترڅنګ د هغوی د کورنیو، استادانو او عامې روغتیا وزارت د رهبرۍ هڅې وستایلې او ویې ویل: «هیله لرم چې بریالي شئ او د متعهدو کسانو په توګه د ټولنې لپاره د خدمت وړ وکرځئ.»
د یادونې وړ ده، چې د پوهاند غضنفر روغتیایي علومو انسټيټیوټ د مرکز سر بېره په ۱۶ ولایتونو کې هم څانګې لري، چې په دولسو بېلابېلو روغتیایي برخو کې وړ او مسلکي کسان روزي او ټولنې ته یې د خدمت په موخه وړاندې کوي.
