د عامې روغتیا وزیر او د روغتیا نړیوال سازمان ترمنځ د پولیو پر له منځه وړلو مهمه ناسته
د ا.ا.ا د عامې روغتیا وزیر، ښاغلي مولوي نور جلال جلالي په خپل کاري دفتر کې د افغانستان لپاره د روغتیا نړیوال سازمان له مشر، ښاغلي ایډوین سنیزا، د یاد سازمان د پولیو برخې مشر ډاکټر محمد جمال او نورو مسؤولینو سره د یو شمېر مهمو موضوعاتو اړوند لیدنه ترسره کړه:
په دې لیدنه کې د پولیو ناروغۍ د تشخیص اړوند د پولیو لابراتوار د کارکوونکو پر ظرفیت لوړونې، د پولیو د تشخیص لابراتوار د څانګو پر پراختیا او تمویل، د پولیو ناروغۍ سره پر مبارزې او محوه کولو، د روغتیایي خدماتو پر پراختیا، ظرفیت لوړونې او د راتلونکو تخنیکي ناستو پر اجنډا او اړوندو موضوعاتو بحث او خبرې ترسره شوې.
د عامې روغتیا وزیر د نورو موضوعاتو تر څنګ وویل؛ د پولیو ناروغۍ د تشخیص لابراتوار باید لا فعال او په هر اړخیزه توګه یې تمویل او تجهیز وشي، نوموړي همدا راز د روغتیا نړیوال سازمان د مسؤولینو څخه د زیاتې پاملرنې او عاجلو اقداماتو غوښتونکی شو تر څو د پولیو د تشخیص لپاره ټول امکانات پر کور دننه برابر او تشخیص یې پر وخت په معیاري توګه تر سره شي.
