د عامې روغتیا وزارت له لوري د پولیو (ګوزڼ) پروګرام د ملاتړ او د اړوندو ادارو ترمنځ د همغږۍ پیاوړتیا په موخه بینالوزارتي غونډه تر سره شوه
په دې غونډه کې د عامې روغتیا وزیر ښاغلي مولوي نور جلال جلالي، د پولیو له منځه وړلو ملي بېړني عملیاتي مرکز رئیس الحاج ډاکټر عبدالقدوس بریالي، د پوهنې وزارت، لوړو زده کړو وزارت، د ارشاد، حج او اوقافو وزارت، د امر بالمعروف، نهی عن المنکر او شکایاتونو اورېدلو وزارت، کورنیو چارو وزارت، اطلاعاتو او کلتور وزارت، روغتیا نړیوال سازمان، یونیسف او نورو همکارو ادارو مسؤلینو او استازو ګډون کړی و.
د عامې روغتیا وزیر، ښاغلي مولوي نور جلال جلالي د پولیو مخنیوي برخه کې د ټولو ادارو ګډې همکارۍ ته په اشارې وویل:( د ماشومانو د روغتیا ساتنې لپاره د ټولو دولتي او ټولنیزو بنسټونو ملاتړ اړین دی او د پولیو له منځه وړلو لپاره باید د عامه پوهاوي کچه لوړه شي).
ښاغلي وزير زیاته کړه، چې د ټولو ادارو ترمنځ منظمه همغږي او ګډ کار کولای شي د واکسین پروګرامونه لا اغېزمن کړي او هر ماشوم ته د واکسین د تطبیق زمینه برابره کړي
دغه راز، د پولیو د له منځه وړلو ملي بېړني عملیاتي مرکز رئیس، الحاج ډاکټر عبدالقدوس بریالي د هېواد په بېلا بېلو سیمو کې د پولیو ویروس د وضعیت، شته ننګونو او د ګډ کار د اهمیت په اړه معلومات شريک او ټینګار یې وکړ، چې د ټولو سکتورونو ترمنځ همغږي کولای شي د پولیو واکسین کمپاینونو اغېز زیات او ټولو ماشومانو ته د لاسرسي زمینه برابره کړي.
د يادې غونډې په پای کې د بېلا بېلو وزارتونو استازو هم څرګندونې وکړې او د پولیو پروګرام د ملاتړ تر څنګ یې ډاډ ورکړ، چې اړوندې ادارې به د عامه پوهاوي، همغږۍ او د واکسین ټیمونو د ملاتړ برخه کې لازمې همکارۍ ته دوام ورکړي.
