د فراه ولايت د روږدو درملنې ۸۰ بستريز روغتون څخه ۳۷ تنه تداوي شوي ناروغان د حرفوي زده کړو له درې مياشتنۍ روزنيزې برنامې بشپړېدو وروسته فارغ شول
دغه کسان د نل دوانۍ، جاري برېښنايي سیستم، لمريز برېښنايي سیستم او د موټرسایکل ترمیم برخو کې له درې میاشتنیو مسلکي زده کړو وروسته فارغ او ټولنې ته د خدمت په موخه وړاندې شول.
د فراه ولایت د عامې روغتیا مرستیال، ډاکټر دین محمد عبدالحق په همدې موخه جوړې شوې غونډې کې د دې پروګرام پر پیاوړتیا ټینګار وکړ او ویې ویل: ( د عامې روغتیا ریاست رهبري هڅه کوي؛ ترڅو د روږدو درملنې ملي برنامې څخه تداوي شويو کسانو ته د غوره روزنې او ظرفیت لوړونې زمینه برابره کړي).
دغه راز، له دې پروګرام څخه دوو تنو فارغانو، محمد صادق او عنایتالله څرګنده کړه، چې مسلکي روزنې یې د ژوند مسیر بدل کړی او په ژوند کې یې نوې هیلې پیدا کړي دي. هغوی وویل چې د دې مهارتونو څخه په ګټه اخیستنې کولای شي د ژوند نوې مرحله پیل کړي.
د يادونې وړ ده، چې د مسلکي روزنې ترڅنګ اړین کاري وسایل او تصدیق سندونه هم دغه کسانو ته وویشل شول.
