د عامې روغتیا ولایتي مسؤلینو د کوچني اختر پر مهال له روغتیايي کارکوونکو سره لیدنې ترسره کړې
د ا.ا.ا د عامې روغتیا وزارت اړوند د عامې روغتیا ولایتي ریاستونو رئیسانو او نورو مسؤلینو د کوچني اختر په درې ورځو کې د روغتیايي کارکوونکو د نه ستړې کېدونکو خدمتونو د قدردانۍ په موخه هغوی سره له نږدې لیدنې وکړې.
د دغو لیدنو موخه د روغتیايي کارکوونکو د هڅو، اخلاص، ژمنتیا او خدمتونو ستاینه او تشویق و.
همداراز، ولایتي مسؤلینو د روغتیايي خدمتونو د ارزونې لپاره د اختر په ورځو کې له روغتیايي مرکزونو څخه هم لیدنې وکړې؛ څو د خدمتونو بهیر له نږدې وڅاري او ډاډ ترلاسه کړي چې هېوادوالو ته پر وخت او معیاري خدمات وړاندې کېږي.
سربېره پر دې، د خدماتو لا ښه والي لپاره اړوندو مسؤلینو ته لازمې سپارښتنې هم وشوې؛ ترڅو په راتلونکې کې د روغتیايي خدمتونو کیفیت لا لوړ او اغېزمن شي.
