په کندز ولایت کې د انتاني ناروغيو درملنې ۵۰ بستریز روغتون جوړ او ګټې اخيستنې ته وسپارل شو
د دغه روغتون پرانيسته د يو لړ مراسمو په ترڅ کې د ياد ولايت د مقام مرستیال، د امارتي ادارو يو شمېر رئیسانو، د ملي او نړیوالو بنسټونو استازو، متخصصينو، قومي مشرانو او د رسنیو استازو په شتون کې تر سره او ګټې اخيستنې ته وسپارل شو.
ګډونوالو دا اقدام د روغتیايي خدمتونو ښه والي او خلکو ته د معیاري درملنې د لاسرسي زیاتوالي په برخه کې یو مهم ګام وباله او د دغه روغتیايي مرکز په جوړېدو یې خوښي څرګنده کړه.
همدارنګه، په دې مراسمو کې د کندز ولایت د مقام مرستیال د دې ولايت د عامې روغتیا رئیس، ډاکټر محمدالله حکمت له هڅو څخه ستاینه وکړه او د ياد روغتون پرانیسته یې د دغه ولایت اوسېدونکو لپاره یو مهمه لاسته راوړنه وبلله.
