الحافظ ډاکټر نعیمالله ایوبي په بنګلهدېش کې د درملو د تنظیم ادارې له مشر سره وکتل
د افغانستان ا.ا د عامې روغتیا وزارت د درملو او روغتیایي محصولاتو د تنظیم لوی رئیس الحافظ ډاکټر نعیم الله ایوبي او مل تخنیکي ټیم بنګله دېش ته د سفر په ترڅ کې د یاد هېواد د درملو د تنظیم ادارې له لوی رئیس ښاغلي محمد عالمګیر حسین سره لیدنه وکړه
په دې لیدنه کې دواړو لورو د درملو او روغتیایي محصولاتو د سکتور تنظیم، څارنې او پراختیا اړوند مهمو موضوعاتو باندې خبرې ترسره او نظرونه شریک کړل. سربېره پر دې، په افغانستان کې د درملو او روغتیایي محصولاتو د ثبت او راجستر پروسو اسانه کولو او په دې برخه کې د بنګله دېش د عملي تجربو څخه د ګټې اخیستنې په اړه هر اړخیز بحث ترسره شو.
همدارنګه، په دې لیدنه کې دواړو لوریو د تخنیکي همکاریو پر اهمیت، د کاري تجربو پر شریکولو او په روغتیایي سکتور کې د دوه اړخیزو اړیکو پر پیاوړتیا ټینګار وکړ او دا چاره یې د روغتیايي خدمتونو د کیفیت لوړولو او د دواړو هېوادونو د څارنې سیستمونو ښه والي لپاره مهمه وبلله.
