د جنډر پراساس د تاوتریخوالي پروګرام ادغام لپاره د تخنیکي کمېټې ناسته جوړه شوه
دغه ناسته د پالیسۍ او پلان جوړونې معین ډاکټر بشیر نورمل په مشرۍ، په افغانستان کې د برېتانیا سفارت، د ملګرو ملتونو د نفوس صندوق، هېلټ نېټ ټي پي او استازو او د عامې روغتیا وزارت داخلي رئیسانو په شتون د پالیسۍ او پلان جوړونې دفتر کې ترسره شوه.
د دې ناستې هدف د جنډر پراساس د تاوتریخوالي پروګرام د مرکزونو مسؤلیتونه د ملګرو ملتونو د نفوس صندوق لخوا د هېواد د عامې روغتیا وزارت ته سپارل دي.
په دې ناسته کې، ګډونوالو د دې برنامې بریالي لېږد لپاره خپل نظریات او وړاندیزونه وړاندې کړل او ټینګار یې وکړ چې په دې برخه کې باید یوه ستراتیژي جوړه شي او د دې مطابق به د لېږد پروسه دوام وکړي.
د یادونې وړ ده چې د جنډر پر اساس د تاوتریخوالي مرکزونه د ملګرو ملتونو د نفوس صندوق په مالي ملاتړ ۲۶ ولایتونو کې، د ۳۷ مرکزونو لخوا پلي کېږي.
