د عامې روغتیا وزارت د هېواد اوسېدونکو څخه وغوښتل چې د لوی اختر په ورځو کې روغتیایي سپارښتنې عملي کړي

د عامې روغتیا نوماند وزیر ډاکټر احمد جواد عثماني نن د حج او اوقافو وزیر ښاغلي عبدالحکیم منیب سره په ګډه خبري ناسته کې د هیواد پر ټولو اتباعو/ اوسېدونکو غږ وکړ چې د لوی اختر په ورځو کې د کورونا ویروس د مخنیوي لپاره د خپلوانو او ملګرو کورونو ته له تګ څخه ډه ډه وکړي.

ډاکټرعثماني وویل چې د کرونا ویروس د ترسره شویو احصایو له مخې نظر تېرته کم شوی دی؛ مګر لاهم زموږ هیواد کې د کورونا ویروس کړکیچ شتون لري او خلک باید د اختر په ورځو کې د ګڼې ګونې ځایونو، خپلوانو کورونو، ملګرو کورونو ته له تګ څخه ډډه وکړي او روغتیایي وړاندیزونه علمي کړئ، په ځانګړي توګه ماسک، ټولنیز واټن، د لاسونو مینځل اوغېږ ورکولو څخه ډډه وکړئ.

د عامې روغتیا نوماند وزیر د کرونا ویروس د دوهمې څپې د مخنیوي لپاره د وزارت چمتووالي یادونه وکړه، ویې ویل چې روغتیا وزارت د کورونا ویروس د دوهمې څپې ناورغانو د درملنې لپاره د کابل په څلورو روغتونونو کې د ټولو اسانتیاوو په درلودو سره د درملنې څانګې پرانیستلې او دا لړۍ به ولایتونه کې هم دوام لري.

په ورته وخت کې، د عامې روغتیا وزارت نوماند په لوی اختر اختر کې د کانګو بخار/ تبې د خپریدو په اړه اندیښنه څرګنده کړه او زیاته یې کړه: "خلک باید د کانګو تبې څخه پوره عامه پوهاوی ولري، کوم چې د څارویو له لارې انسانانو ته لیږدول کیږي او د حلالولو/ ‌ذبحه کولو، غوښې پخلي پرمهال د دستکش او ماسک اغوستل، د یاد مرض د مخنیوي لپاره اړین دي.

سربېره پردې، ډاکټر عثماني څرګنده کړه چې د اداري فساد پروړاندې مبارزه د دوی له کاري لومړیتوبونو څخه ده، او د اداري فساد د مخنیوي لپاره، د دې وزارت په مرکزي ډیپو/سټاک کې امنیتي څارونکې کامرې نصب شوي ترڅو د شته تجهیزاتو له نږدې څارنه وکړي.

همدارنګه د دې وزارت نوماند په ټولو کورنیو غږ وکړ چې خپل ماشومان د ګوزڼ، تور ټوخی، سرخکان او تیتانوس ناروغیو د مخنیوي لپاره روغتیایی مرکزونو کې واکسین کړي.

له بلې خوا د حج او اوقافو وزیر ښاغلي عبدالحکیم منیب د حفظ الصحې مراعت ولو پر اړتیا ټینګار وکړ او د هېواد پر ټولو اتباعو/ اوسېدونکو یې غږ وکړ چې د اختر رخصتیو پرمهال د کورونا ویروس د مخنیوي لپاره د عامې روغتیا وزارت وړاندیزونه عملي کړي.

هغه زیاته کړه: "د کورونا ویروس د نازک حالت له امله، د اختر لمونځونو کې برخه اخیستل اختیاري دي، او هغه څوک چې جوماتونو کې د اختر لمونځ کولو لپاره ورځي، ټولنیز واټن باید مراعت کړي، او هغه څوک چې په خطر کې دي یا د کورونا ویروس نښې لري." "د اختر لمونځونو کې ګډون مکوئ تر څو نور په ناروغۍ اخته نشي."