د عامې روغتیا وزارت سرپرست د روغتیا د نړیوال سازمان د ختیځ مدیترانې هېوادونو وزیرانو د همغږۍ ناسته کې ګدون وکړ
سه شنبه، ۲۲/۱۴۰۰
د عامې روغتیا وزارت سرپرست، ډاکتر وحید مجروح، نن د روغتیا د نړیوال سازمان د ختیځې مدیترانې (ایمرو) هېوادونو د وزیرانو د همغږۍ ناسته کې ګدون او وینا وکړه.
په دې ناسته کې، د کورونا ویروس خپرېدو اوسني وضعیت، د دغه ویروس سره د مبارزې څرنګوالی، په ختیځ مدیترانې هېوادونو کې د واکسینو تطبیق او تولید او د دوامداره مالي سرچینو لپاره د کاري کمېټې د رامینځته کولو په اړه بحث او تبادل د نظر وشو.
همدارنګه په دغه ناسته کې، بېړنیو حالتونو ته د ځواب ویلو لپاره د کاري کمېټې په رامینځته کولو ټینګار وشو او برخه اخیستونکو د کمېټې له جوړېدو هرکلی وکړ او ویې ویل چې دا کمېټه به له موږ سره بېړنیو حالتونو ته د لاسرسي او د راتلونکو پانډمي ګانو په مخنيوي کې مرسته کولای شي.
دا په داسې حال کې ده چې د کورونا ویروس ناروغي د ختیځ مدیترانې هېوادونه د واکسینو، اکسیجن او ټولنیزو اړیکو په برخه کې له ننګونو سره مخ کړي دي.
د یادونې وړ ده چې په افغانستان کې د کورونا ویروس درېیمې څپې پر وړاندې مبارزه روانه ده او د عامې روغتیا وزارت په دې هڅه کې دی چې د روغتیایي مرکزونو په تجهیز سره دغه ویروس کنټرول وکړي.
دغه راز، د دې وزارت د لومړیتوبونو پر بنسټ د کورونا واکسین د پلي کولو پروسه د هېواد په ټولو ولایتونو کې په جدي توګه روانه ده.
