د عامې روغتیا وزارت ملي کتلوي معافیت پروګرام آمریت له لوري د واکسیناسیون په اړه «واکسینونه د هر نسل لپاره اغېزمن دي» تر شعار لاندې د عامه پوهاوي غونډه تر سره شوه
په دې غونډه کې د عامې روغتیا وزارت د روغتيايي خدمتونو وړاندې کولو مرستیال ښاغلي مولوي عبدالولي حقاني، د دې وزارت مرکزي رئیسانو، د امارتي ادارو مسؤلينو، د ملي او نړیوالو مؤسسو او رسنیو استازو ګډون کړی و.
د روغتيايي خدمتونو وړاندې کولو مرستيال وویل: د عامه پوهاوي له لارې کولای شو چې په هېواد کې د واکسین د تطبیق بهیر پیاوړی کړو. هغه زیاته کړه چې په ۲۰۲۶ کال کې په دې برخه کې د پام وړ لاسته راوړنې شوې دي او ټینګار یې وکړ، چې د واکسین په اړه پوهاوی ورکول د روغتیايي کارکوونکو، کورنیو، ټولنې، رسنیو او د جوماتونو د امامانو ګډ مسؤلیت دی.
همدارنګه، د عامې روغتیا وزارت د مقام د دفتر لوی رئیس، شيخ محمد طاهر حليم د اسلام له نظره د واکسین پر اهمیت هر اړخیزه وینا تر سره او ټینګار يې وکړ چې وقایه او روغتيا ساتنه د اسلام له مهمو اصولو څخه دي او د واکسین کارول نه يواځې دا چې جواز لري، بلکې د انسانانو د ژوند ساتنې او په ټولنه کې د ناروغیو خپرېدو د مخنیوي لپاره یو ضروري اقدام دی.
همداراز، د ملي کتلوي معافیت پروګرام آمر، علي احمد سیفي وویل: واکسین یو نړیوال پروګرام دی چې له تېرو ۵۲ کلونو راهیسې په ټوله نړۍ کې د هغې نړیواله اونۍ نمانځل کېږي. د دې غونډې موخه د واکسین په اړه د عامه پوهاوي کچه لوړل دي، څو په راتلونکي کې یوه سالمه او روغه ټولنه ولرو.
هغه له ټولو ملي او نړیوالو بنسټونو څخه چې د واکسین په برخه کې فعالیت کوي، مننه وکړه او زیاته یې کړه، چې اوسمهال د یوولسو ناروغیو پر وړاندې واکسین تطبیقېږي.
سربېره پر دې، د یونیسف او روغتیا نړیوال سازمان استازو له کورنیو وغوښتل، چې خپل ماشومان واکسین کړي، تر څو د ناروغیو پر وړاندې خوندي پاتې شي. هغوی همدارنګه په دې برخه کې د ملاتړ او د واکسین د پروګرامونو د پلي کولو په اړه پر خپلې ژمنې ټینګار وکړ.
