د عامې روغتیا وزیر د شهیدانو او معلولینو وزیر سره وکتل
د افغانستان د اسلامي جمهوریت د عامې روغتیا وزیر ډاکټر احمد جواد عثماني؛ د شهیدانو او معلولینو چارو له وزیر ښاغلي لعل الدین آریوبي سره په خپل دفتر کې وکتل.
په دې ناسته کې، د شهیدانو او معلولینو چارو وزیر ښاغلي آریوبي، د هېواد د عامې روغتیا له وزیر څخه وغوښتل چې له دغه وزارت سره د رواني روغتیا، د معلولیت درجې مجدد تثبیت، جندر او روغتیا، د معلولینو لپاره د پلاستیکي اجزاو جوړول، د معلولینو روغتیایي مرکزونو او بیارغونې برخه کې د شهیدانو او معلولینو وزارت سره هر اړخیزه همکاري وکړي.
د عامې روغتیا وزیر ډاکټر احمد جواد عثماني، د ښاغلي آریوبي وړاندیزونو په اورېدو سربېره زیاته کړه چې د عامې روغتیا وزارت رهبري ژمنه ده، چې د شته ستونزو د حل په پار د شهیدانو او معلولینو وزارت سره هر اړخیزه مرسته وکړي او په دې برخه کې به هېڅ ډول هڅه ونه سپموي.
دغه راز دواړو خواوؤ، د مشترکو برنامو، د مشخصې طرحې جوړول، د اوږد مهاله پالیسیو پراختیا، ښوونیزې برنامې، دوه اړخیزه مرستو او د دواړو وزارتونو ترمینځ لازیات همغږي باندې ټینګار وکړ او د لازیات همکارۍ ژمنه یې وکړه.
