د عامې روغتیا وزیر د هلمند له والي سره وکتل
د عامې روغتیا وزیر ډاکټر احمد جواد عثماني، نن د خپل کار په دفتر کې د هلمند ولایت له والي ښاغلي عبدالنبي الهام، محممد کریم اتل او ورسره پلاوي سره وکتل.
په دې ناسته کې، د هلمند والي سره راغلي هیات د یاد ولایت روغتیایي ستونزې د هېواد د عامې روغتیا وزیر سره شریکې کړې او د عامې روغتیا وزارت له رهبرۍ څخه د بېړنۍ پاملرنې څانګې، هیموډیالیز ، د امبولانس مرکز، په مخدره توکو روږدو د درملنې څانګې، د روغتیایي مرکزونو زیاتوالی او د دې ولایت دولتي پوهنتون کې د طب پوهنځی جوړولو برخه کې د همکارۍ غوښتونکي شول.
د عامې روغتیا وزیر د هلمند ولایت د خلکو پر وړاندې شته ستونزو اورېدلو سربېره د ستونزو د حل ځانګړي ډول د روغتیایي مرکزونو په زیاتوالي په پار له دوی سره ژمنه وکړه.
ډاکټر عثماني وویل: چې د بېړنۍ پاملرنې او هیموډیالېز تاسیساتو رامینځته کول به د راتلونکي کال لپاره بودیجه کې شامل کړي او موږ په دې هڅه کې یو چې د معتادینو روغتون له 100 بسترونو څخه 150 بسترونو ته لوړ کړو.
دغه راز د هېواد د عامې روغتیا وزیر زیاته کړه چې په د دغه ولایت په دولتي پوهنتون کې د طب پوهنځی د جوړېدو په اړه د لوړو زده کړو وزارت سره خبرې کوي تر څو دا ستونزه حل شي.
په ورته وخت کې، ښاغلي الهام د دغه ولایت ستونزو په حل کې د عامې روغتیا وزارت له مشرتابه څخه مننه وکړه.
