د محصلینو او زدهکوونکو لپاره د نشهيي توکو د کارونې مخنیوي او عامه پوهاوي پروګرام ترسره شو
د عامې روغتیا وزارت د روږدو درملنې ملي برنامې له لوري د محصلینو او زدهکوونکو د پوهاوي کچې لوړولو او نشهيي توکو ناوړه پدیدې پر لور د ځوانانو د تمایل مخنیوي په موخه، رازي د طبي علومو پوهنتون زده کړيالانو او محمد اسماعیل حسنزي عالي لېسې زدهکوونکو ته د نشهيي توکو د کارونې مخنیوي پروګرام ترسره شو.
د دغه پروګرام په ترڅ کې د عامې روغتیا وزارت د روږدو درملنې ملي برنامې د نشهيي توکو د استعمال مخنیوي ټیم له لوري د نشهيي توکو زیانونو، پایلو او د مخنیوي لارو چارو په اړه علمي او تخصصي سیمینار وړاندې شو، چې په کې په د روږديتوب د رامنځته کېدو لاملونه او عوامل وڅېړل شول او هغه ټولنیز، اقتصادي، کورني او رواني عوامل، چې د دې پدیدې په رامنځته کېدو کې اغېز لري تشریح شول.
همدارنګه، د روږديتوب نښې له فزیکي او رواني اړخونو څخه په مفصله توګه وڅېړل شوې؛ څو زده کړيالان او زدهکوونکي وکولای شي، د روږديتوب لومړنۍ نښې وپېژني، د مخنیوي او اغیزمن عامه پوهاوي برخه کې خپل رول په ښه توګه ادا کړي.
