د ملاریا نړیواله ورځ د عامې روغتیا وزارت له لوري ونمانځل شو
د ملاریا نړیواله ورځ د عامې روغتیا وزارت له لوري د “ملاریا محوه، د پانګونې، نوښتونو او کړنلارو پلې کولو له لارې” تر شعار لاندې ونمانځل شوه.
د ملاریا نړیواله ورځ د عامې روغتیا وزارت د عرضه خدماتو معین، مولوي حبیب الله اخندزاده، د نړیوالو اړیکو رئیس، مولوي محمد داوود منصوري، د روغتیا نړیوال سازمان استازي، ډاکټر لوو داپینګ د نړیوال سازمان د پراختیا ادارې استازې او نورو مسئولینو په شتون کې ونمانځل شوه.
د عرضه خدماتو معین، ښاغلي مولوي حبیب الله اخندزاده یادې غونډې ته په وینا کې وویل، دغه ناروغي چې هر کال د مېلیونونو انسانانو ژوند ګواښي ټول دولتونه، نړیوال سازمانونه او نور ذیربط ارګانونه یې باید د کنټرول لپاره مبارزه وکړي.
ښاغلي معین همداراز زیاته کړه چې په ۲۰۲۲م کال کې په ټول هېواد کې ۱۲۵۷۸۸ پېښې راپور شوي دي چې د همدې کال په بهیر کې له دوه مېلیونو زیاتې ماشلومې په ټول هېواد کې وېشل شوې دي او همدارنګه له تېرو څلورو کلونو څخه په ټول هېواد کې د مړینې هېڅ کومه پېښه نده ثبت شوې.
د روغتیا نړیوال سازمان د راپور له مخې په ۲۰۲۱م کال کې ملاریا په نړۍ کې د ۶۱۹۰۰۰ کسانو ژوند اخیستی او په دې کال کې د ملاریا شاوخوا ۲۴۷ میلیونه نوې پېښو شتون درلود.
د یادونې وړ ده چې دا ورځ هر کال په نړۍ کې د دوو مهمو دلایلو لپاره نمانځل کېږي، د ملاریا سره د مبارزې په برخه کې د بریالیتوبونه نمانځل او په ورته وخت کې د هغه مسئولیتونو په ګوته کول چې ټول یې باید د ملاریا د له منځه وړلو لپاره ترسره کړي.