د کورونا ویروس دویمې څپې د مخنیوي لپاره هڅې روانې دي
د هېواد د عامې روغتیا وزیر ډاکټر احمد جواد عثماني نن د "اتو بجو" په ناسته کې د سمنګان، ننګرهار، سرپل، جوزجان ولایتونو او کورونا ویروس پر وړاندې د مبارزې کمیټو دندې وارزولې.
په دې ناسته کې د یادو ولایتونو د عامې روغتیا رئیسانو، د روغتیایي خدمتونو یوشمېر پلي کونکو مؤسسو، د کورونا ویروس پر وړاندې د مبارزې کمېټو د خپلو کړنو او ستونزو کاري راپور په مفصل ډول تشرېح کړ.
د عامې روغتیا وزیر د دوی د کړنو ارزولو پرمهال په مرکز او ولایتونو کې د شته ستونزو د حل لپاره اړوندو د ادارومسؤلینو ته لازمې لارښوونې وکړې.
ډاکټر عثماني په هېواد کې د روغتیايي خدمتونو د وړاندې کولو پر ښه والي ټینګار وکړ او د عامې روغتیا له ولایتي مسؤلینو یې وغوښتل چې خپلې لومړنۍ اړتیاوې د عامې روغتیا وزارت سره شریکې کړي ترڅو د اړوندو ادارو لخوا ورته لاسرسی وشي.
دغه راز د عامې روغتیا وزیر وویل: هغه مسافرین چې د ځمکې له لارې پاکستان هېواد ته سفر کوي د کورونا ویروس ازمایښت ته اړتیا نلري او یوازې هغه کسان چې د هوا له لارې سفر کوي باید د کورونا ویروس ازمایښت ترسره کړي.
