په هېواد کې د کورونا ویروس د مخنیوي په پار د خلکو لخوا د روغتیايي سپارښتنو په پلي کولو د عامې روغتیا وزارت د رهبرۍ ټنیګار
د افغانستان اسلامي جمهوريت د عامې روغتيا وزارت نوماند وزیر ډاکټر احمد جواد عثماني؛ نن په يوه خبري ناسته کې په هېواد کې د کورونا ويروس مخ په زياتېدو خبر ورکړ.
د عامې روغتیا وزارت نوماند وايي چې د کورونا ویروس د تېرو اونیو په پرتله په هېواد کې مخ په ډېرېدو دی او مثبتې پېښې ډېرې شوي دي.
هغه همدا ډول وویل: چې په افغانستان کې د کورونا وضعیت د ګاونډیو هېوادونو په پرتله د ډاډ وړ دی او د خلکو ترمنځ باید هېڅ وېره شتون ونلري، ځکه چې وېره پخپله د معافیت سیسټم کمزوری کوي.
ډاکټر عثماني په لازمي ډول د ماسک اغوستلو باندې ټینګار وکړ او په خلکو یې غږ وکړ چې د کورونا ویروس د مخنیوي په پار روغتیایي سپارښتنې په ځانګړي توګه د ماسک اغوستل دې په جدي ډول رعایت/پلي کړي.
د عامې روغتیا نوماند وزیر په روغتیايي مرکزونو کې د کورونا ویروس د دوهمې څپې د مخنیوي په برخه کې د وزارت د اقداماتو په اړه ډاډ ورکړ او ویې ویل: چې د کابل او ولایتونو په ټولو روغتونونو کې د کورونا ویروس د پاملرنې او درملنې څانګې جوړې شوې دي، روغتونونه د امکاناتو او اسانتیاوؤ له اړخه سمبال شوي دي.
له بلې خوا، ډاکټر عثماني په ایران او پاکستان کې د کورونا وضعیت د اندېښنې وړ وباله او په خلکو یې غږ وکړ چې دې هېوادونو ته د غیر ضروري سفرونو څخه ډډه وکړي چېرې چې د کورونا ویروس خپرېدونکی دی.
د عامې روغتیا نوماند وزیر، د خصوصي لابراتوارونو جدي څارنې په اړه وویل: چې د خصوصي لابراتوارونو دندې د عامې روغتیا وزارت لخوا په جدي توګه څارل کېږي او که چېرې دوی د کورونا ویروس ازموینې پایلې په وړاندې کولو کې سرغړونه وکړي نو قانوني چلند به ورسره وشي.
د یادونې وړ ده چې په تېرو ۲۴ ساعتونو کې د عامې روغتیا وزارت په لابراتوارونو کې د کورونا ویروس ۴۵۳ شکمنې نمونې معاینات شوې دي چې له دې جملې ۱۳۲ مثبتې تائید شوي ۱۵ تنه روغ شوي او ۵ تنه نور مړه شوي دي.
