په کابل کې د زړه ناروغانو د درملنې ۱۰۰ بستریز روغتون جوړولو د اړتیاوو ارزونې په موخه ورکشاپ ترسره شو
په دې ورکشاپ کې د عامې روغتیا وزارت د روغتیايي پراختيا او پالیسۍ مرستیال ښاغلي ډاکټر محمد حسن غیاثي، د وزارت مرکزي رئیسانو، د مالیې وزارت، اسلامي پراختیایي بانک او ساختماني شرکتونو استازو ګډون کړی و.
د دې ورکشاپ موخه په کابل کې د زړه ناروغانو درملنې لپاره د ۱۰۰ بستریز روغتون جوړولو چارې په ښه توګه پرمخ وړل و، چې دا چارې د اسلامي پراختیایي بانک، عامې روغتیا وزارت، ساختماني شرکتونو او همکارو ادارو په مالي ملاتړ ترسره کېږي.
د دې ورکشاپ پرانيسته کې د عامې روغتیا وزارت د روغتیايي پراختيا او پالیسۍ مرستیال وویل: ( د خوښۍ ځای دی چې نن موږ په کابل کې د زړه ناروغانو درملنې ۱۰۰ بستریز روغتون د جوړولو د کار پیل شاهدان یو، چې دا په هېواد کې د روغتیایي سیسټم د ښه والي لپاره یو مهم او اغېزمن ګام دی).
ښاغلي مرستيال زیاته کړه، عامې روغتیا وزارت د ساري ناروغیو د درملنې په برخه کې اړین اقدامات تر سره کړي دي او دا ناروغۍ د کمېدو په حال کې دي، هغه همدارنګه ټینګار وکړ، چې د دې وزارت رهبرۍ د غیر ساري ناروغیو په برخه کې هم اغېزمن کارونه کړي دي او په دې برخه کې یې د اندراګاندي د ماشومانو درملنې روغتون او ابن سینا صدري روغتون د خدمتونو څخه يادونه وکړه.
دغه راز، د عامې روغتیا وزارت د پلان او پالیسۍ لوی رئیس، ډاکټر سید رسول منګل وویل: (د اسلامي امارت په راتګ سره د هېواد په بېلا بېلو سکتورونو کې د پام وړ مثبت بدلونونه راغلي دي، چې په کابل کې د زړه ناروغانو د درملنې ۱۰۰ بستریز روغتون جوړول د هغې یوه بېلګه ده او دا روغتون به نه یوازې د زړه ناروغانو درملنې برخه کې فعاليت کوي تر څنګ به یې په هېواد کې متخصص ډاکټران هم روزي).
بل لور د اسلامي پراختیایي بانک او د ساختماني شرکتونو استازو چې د دې روغتون په جوړولو کې به کار کوي، ګډونوالو ته د یو پرېزنټېشن په ترڅ کې د دې روغتون د جوړوېدو د چارو او مراحلو په اړه معلومات ورکړل، چې ګډونوالو په دې اړه خپل نظرونه شريک او پوښتنو ته یې ځوابونه وويل شول.
