د عامې روغتیا وزارت د نویو طرحو د پلي کولو څرنګوالي په اړه بحث وشو
شنبه، وری ۲۱/۱۴۰۰
د عامې روغتیا وزارت سرپرست ډاکټر وحید مجروح، نن د دغه وزارت د اجرائیوي بورډ په غونډه کې د عامې روغتیا وزارت د نویو طرحو د پلي کولو څرنګوالي په اړه چې د جمهوري ریاست د عالي مقام لخوا تائید شوي دي تر بحث لاندې ونیول شوې.
په دې ناسته کې د اکسیجن دستګاه وؤ د نصب کولو کاري بهیر د پرمختګ، د روغتونونو لپاره د ملي پراختیا ادارې لخوا د اخیستل شوي تختونو تحویل اخیستل، د روغتیا ملي جشنوارې په لاره اچول، ترمیم ته د اړتیا لرونکي روغتونونو بیارغونه، د تشکیلاتي اصلاحاتو طرحې او نورو روغتیایي مواردو په اړه بحث او د نظر تبادله وشوه.
د عامې روغتیا وزارت سرپرست د عامې روغتیا وزارت د نویو طرحو د پروسې په ګړندي کولو باندې ټینګار وکړ او د اړوندو څانګو له مسؤلینو یې وغوښتل چې د دې طرحو پلي کولو د ګړندي کولو لپاره د څو کمېټو په جوړولو باندې کار وکړي.
ډاکټر وحید مجروح په یادو څانګو کې د کار پروسې د ښه والي او پرمختګ په پار د اړوندو ادارو مسؤلینو ته لازمې لارښوونې وکړې او له هغوی یې وغوښتل چې د تشکیل د اصلاحاتو طرحې او د دې وزارت نورو برنامو د پلي کولو برخه کې لا ډېر کار وکړي.
