د وینې ورکوونکو نړیواله ورځ د عامې روغتیا وزارت له لوري د یوې غونډې په ترڅ کې ونمانځل شوه
په دې غونډه کې د عامې روغتیا وزارت رئیسانو، روغتیايي کارکوونکو او یو شمېر وینې ورکوونکو رضاکارو ګډون کړی و.
د عامې روغتیا وزارت د وینې ملي بانک رئیس، ډاکټر محمد ناصر صادق د وینې ورکوونکي اتلان وګڼل او ویې ویل: ( د وینې ملي بانک په تېر یوه کاله کې ۱۰۷ مېلیونه ۸۴۱۰۰۰ زره سي سي وینه راټوله کړې، د یو مېلیون ۳۵۶ زره او ۷۸۵ کسانو د وینې ګروپ تعیین شوی او درې لکه ۱۶ زره او ۸۲۶ یونېټه وینه ناروغانو ته ورکړل شوې ده.)
نوموړي همداراز له ټولو وینې ورکوونکو مننه وکړه او ویې ویل، د وینې د ورکړې فکر باید عام شي او په دې برخه کې باید عامه پوهاوی ترسره شي.
همدارنګه د عامې روغتیا وزارت د جمهوریت روغتون رئیس او معالجوي طب سرپرست، ډاکټر امین الله معیني او د عامې روغتیا وزارت د دعوت او ارشاد رئیس، مولوي محمد قاسم حقاني د وینې د ورکړې پر اهمیت خبرې وکړې او له ټولو هېوادوالو څخه يې غوښتنه وکړه چې د وینې په ورکړې سره د اړمنو ژوند و ژغوري.
