د هلمند ولایت د نهرسراج ولسوالۍ اړوند د یخچال سیمې نوی بشپړ روغتیايي مرکز د ۲۵ میلیونه او ۵۰ زره افغانیو په لګښت جوړ او ګټې اخیستنې ته وسپارل شو
د یاد روغتیايي مرکز پرانیستې مراسمو کې چې د هلمند والي مولوي امان الدین منصور، د عامې روغتیا رئیس ډاکټر نقیب الله فاتح او یو شمېر نورو مسؤلینو شتون درلود، د عامې روغتیا رئیس وویل: د دغه ډول روغتیايي مرکزونو جوړېدل د خلکو د روغتیايي ستونزو په کمولو کې مهم رول لري او زیاته یې کړه، د یخچال سیمې روغتیايي مرکز په فعالېدو سره به د نهرسراج ولسوالۍ اوسېدونکي له معیاري، پر وخت او اساسي روغتیايي خدماتو څخه برخمن شي.
دغه مرکز د کډوالو په چارو کې د ملګرو ملتونو عالي کمېشنرۍ په مالي ملاتړ پر پنځه جریبه ځمکه جوړ شوی، چې په بېلابېلو روغتیایي اسانتیاوو سمبال دی.
