د ا.ا.ا د عامې روغتیا وزیر، ښاغلي مولوي نور جلال جلالي او مل پلاوي سعودي عربستان ته د خپل رسمي سفر په ترڅ کې د شاه سلمان بنسټ له رئیس ښاغلي دکتور عبدالله ربیعه سره لیدنه ترسره کړه
په دې لیدنه کې د افغانستان د روغتیا له سکتور سره د شاه سلمان بنسټ د انکشافي او بشري مرستو په چوکاټ کې د همکاریو پر ایجاد او پراختیا، د سرطاني ، قلبي او د ولسوالیو د کچې عمومي روغتونو په مجهز کولو او د ساري ناروغیو سره پر مبارزې خبرې تر سره شوې.
د مجلس په جریان کې د افغانستان ا.ا.ا د عامې روغتیا وزیر ښاغلي مولوي نور جلال جلالي د شاه سلمان بنسټ مسؤول ښاغلي ربیعه ته دعوت ورکړ تر څو د لا ښې همغږۍ او د هیواد د روغتیایي سکتور سره د همکارۍ په موخه د سعودي شاهي دولت د روغتیا له وزیر سره یو ځای د افغانستان څخه لیدنه وکړي.
دوکتور ربیعه له دعوت څخه په مننې وویل؛ دا به زما لپاره یو ویاړ وي چې افغانستان ته دعوت شم او ژمنه یې وکړه چې د خپلو امکاناتو په چوکاټ کې به د روغتیایي تجهیزاتو، ظرفیت لوړونې ، معیاري درملنې او نورو برخو کې مرسته وکړي.
همدارنګه نوموړي وویل خوښ به شم چې ستاسې د لمړیتوبونو اړوند معلومات راسره شریک کړئ تر څو ستاسې د لمړیتوبونو او ضرورتونو په اساس د همکارۍ اقدامات تر سره کړو.
د یادونې وړ ده د عامې روغتیا وزیر سعودي عربستان ، ته د خپل سفر پر مهال له بېلا بېلو مسؤولینو سره لیدنې تر سره کړي چې موخه یې د هیواد د روغتیایي سیستم پرمختګ او د نړیوالو سره د لا ښې همغږۍ رامنځ ته کول دي.
