د اداري اصلاحاتو او ملکي خدمتونو لوی ریاست له لوري د عامې روغتیا وزارت خالي بستونو لپاره الکترونیکي ازموینه پیل شوه
په دې ازموینه کې چې څه باندې ۱۰۰۰ کسانو ګډون درلود، له ۱۰۰ څخه زیاتو خالي بستونو لپاره ترې ازموینه واخیستل شوه او دا بهیر په درې پړاوونو کې ترسره کېږي، چې دغه اقدام د ازادې سیالۍ له لارې د وړ، مسلکي او ژمنو کسانو د جذبولو لپاره ترسره شوی؛ څو د هېواد روغتیايي سکټور کاري وړتیا لا پیاوړې شي.
د عامې روغتیا وزارت د مالي او اداري چارو مرستیال، ښاغلي قاري عبدالولي صدیقي وویل: (د ازادې سیالۍ له لارې د خالي بستونو ډکول د وړ او مسلکي کسانو د ګمارنې په موخه ترسره کېږي، خو له وړتیا او مسلک سره تقوا او دینداري هم لازمه ده).
ښاغلي مرستيال زیاته کړه، عامې روغتیا وزارت ژمن دی، چې خالي بستونه مسلکي او متخصصو کسانو ته وسپاري او دا بهیر به په دوامداره توګه جاري وساتي؛ څو عدالت او شفافیت تأمین شي.
همدارنګه، د ملکي خدمتونو د ګمارنې د اسانتیا رئیس محمد حنان حقاني وویل، دا ازموینه په بشپړ شفافیت سره ترسره شوې او هېڅ ډول تخلف ته په کې اجازه نه ده ورکړل شوې.
هغه ټینګار وکړ، چې ټول پړاوونه به د اصولو او مقرراتو سره سم پر مخ یووړل شي؛ څو ګمارنې د وړتیا پر بنسټ یقیني او د خلکو باور لا زیات پیاوړی شي.
