د افغانستان اسلامي امارت د روغتیایي اتشې له لورې د ترکیې له مخکښو پوهنتونونو او روغتونونو سره د همکاریو بحث
ترکیې کې د ا.ا.ا د سفارت روغتیایي اتشې، دوکتور فضل الله سیرت د ترکیې په مرکز انقره ښار کې د لقمان حکیم پوهنتون او روغتون له مسؤلینو او کرشهیر آخي اېوران دولتي پوهنتون له رئیس، پروفیسور ډاکټر مصطفی قاسم کاراهو جاګیل سره لیدنې ترسره کړې
یادو لیدنو کې افغان محصلینو لپاره د طبي زده کړو په موخه د فرصتونو برابرولو، ګډې همغږۍ او همکاریو، بېلا بېلو طبي برخو کې د متخصصینو د روزنې، ګډو علمي پروګرامونو، سیمینارونو او د افغان ناروغانو لپاره د روغتیایي خدمتونو پراخوالي په اړه بحث او خبرې وشوې.
متخصص دوکتور فضل الله سیرت د افغان محصلینو او ناروغانو ستونزې او اړتیاوې له مسؤلینو سره شریکې او ټینګار یې وکړ، چې علمي، عملي زده کړو او د درملو برخه کې همکاري باید نوره هم پراخه شي، څو افغان محصلین له معیاري زده کړو او ناروغان له مناسبو او باکیفیته خدماتو څخه برخمن شي.
د کرشهیر آخي اېوران دولتي پوهنتون رئیس د افغانستان او ترکیې تر منځ د علمي، انساني او روغتیایي همکاریو د لا پراختیا هرکلی وکړ او ژمنه یې وکړه، چې د افغان محصلینو او ناروغانو ملاتړ ته به دوام ورکړي.
