د جوزجان ولایت د روغتیايي مرکزونو د وضعیت ارزونه ترسره شوه
د عامې روغتیا وزارت د روغتیايي قوانینو د تطبیق او پلټنې رئیس، مولوي محمودالله زاهد او مل تخنیکي پلاوي د روغتیايي وضعیت ارزونې په موخه جوزجان ولایت ته سفر تر سره کړ.
د دې سفر په ترڅ کې د جوزجان ولایت د عامې روغتیا رئیس، قاري ذبیحالله حسيني سره ناسته ترسره او له ولایتي روغتون او یو شمېر دولتي او خصوصي روغتیايي مرکزونو څخه نظارت ترسره شو.
د نظارت پر مهال د روغتیايي خدمتونو کیفیت، د کارکوونکو شتون او کاري نظم، د درملو او طبي تجهیزاتو وضعیت، لابراتوارونه، حفظالصحې، د انتاناتو کنټرول، د ثبت او راپور ورکولو سیستم او عمومي وضعیت وارزول شول.
همدارنګه، د خدمتونو د کیفیت لوړولو، د ساري ناروغیو د کنټرول، له شته امکاناتو څخه د اغېزمنې ګټې اخیستنې او مراجعینو ته د معیاري خدمتونو وړاندې کولو په موخه لازمې سپارښتنې تر سره او پر حساب ورکونې او شفافیت يې ټينګار وکړ.
