د خصوصي روغتونونو د اعتبار ورکولو او درجه بندۍ معیارونو د پراختیا په موخه تعقیبي ناسته ترسره شوه
دا ناسته د تېرو ناستو په تعقیب د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني په مشرۍ یاد معینیت کې ترسره شوه، چې په کې د پلان او پالیسۍ، خصوصي روغتیايي سکټور، اکمال تخصص، ICU، معالجوي طب، د ناروغیو د کنټرول او مخنیوي ریاست او روغتیا نړیوال سازمان استازو ګډون کړی و.
د عامې روغتیا وزارت د روغتیايي خدمتونو وړاندې کولو مرستیال وویل: د اماراتي روغتونونو د ملاتړ سربېره، موږ د اسلامي امارت د اصولو او قوانینو پر بنسټ د روغتونونو او خصوصي روغتیایي سکټور ملاتړ ته ژمن یو او هڅه کوو، ډاډ ترلاسه کړو چې زموږ خلکو ته د خصوصي سکټور له لوري اغېزمن او ګټور روغتیايي خدمات وړاندې شي او دا پروسه به نه یوازې خدمات ښه کړي، بلکې شفافیت او خوندیتوب به هم تامین کړي.
