د دایکندي ولایت له استازو سره د عامې روغتیا وزارت د سرپرست لیدنه
د عامې روغتیا وزارت سرپرست وزیر ډاکټر وحید مجروح، نن د خپل کار په دفتر کې د دایکندي ولایت د مدني ټولنې له استازو، مشرانو او مخورو خلکو سره وکتل.
په دې ناسته کې د دایکندي ولایت استازو د عامې روغتیا وزارت له مشر سره د دې ولایت روغتیایي ننګونې شریکې کړې او په دغه ولایت کې په ځانګړي ډول سنګ تخت ولسوالۍ کې د روغتیايي مرکزونو د زیاتوالي غوښتونکي شول.
د عامې روغتیا وزارت سرپرست، د دغه ولایت د ننګونو د اورېدو پرمهال وویل: چې د جغرافیایي او د سړکونو ستونزو له امله د دایکندي ولایت محرومیت د درک کولو وړ دی.
ډاکټر مجروح د دغه ولایت د روغتیایي ستونزو د حل په پار د اړوندو ادارو مسؤلینو ته لارښوونه وکړه چې د دغه ولایت مالي سرچینې، روغتیایي اړتیاوې تحلیل او وارزوي او د بودیجې د شتون په صورت کې د دوی د ننګونو حلولو لپاره اقدامات وکړي.
له بلې خوا، د عامې روغتیا وزارت سرپرست د روغتیایي ادارو مسؤلینو ته لارښوونه وکړه چې د دایکندي ولایت د روغتیايي خدمتونو پلي کونکې مؤسسې مسؤل کابل ته را وغواړي ترڅو هغه شکایتونه چې د دې مؤسسې د کاري غفلت په اړه موجود دي تر څېړنې لاندې ونیول شي.
