د روغتونونو د اداري سیستم د ډیجیټل کولو په موخه د څلورو وزارتونو ګډه ناسته ترسره شوه
د عامې روغتیا وزارت د معالجوي طب لوی رئیس، ډاکټر وحدت الکوزي د مرکز او روغتونونو د اداري سیسټم د ډیجیټل کولو (برېښنايي کېدو) په موخه له ماليې، لوړو زده کړو او مخابراتو وزارتونو مسؤلینو سره ګډه ناسته ترسره کړه
په دې ناسته کې د عامې روغتیا وزارت د معالجوي طب لوی رئیس، ډاکټر وحدت الکوزي وویل: «د روغتیايي خدمتونو د لا ښه مدیریت، اسانه لاسرسي او د ناروغانو د معلوماتو د دقیق ثبت لپاره د روغتونونو د اداري سیسټم ډیجیټل کېدل یوه بنسټیزه اړتیا ده. هغه زیاته کړه، چې د شفاف سیسټم له لارې د معالجوي خدمتونو کیفیت تضمینېدلی شي او دا کار به د ناروغانو د رضایت کچې زیاتېدو لامل هم شي».
د ناستې په پای کې پریکړه وشوه، چې د عامې روغتیا او لوړو زده کړو وزارتونه به خپلې اړتیاوې د ماليې او مخابراتو له وزارتونو سره شریکې کړي، څو د روغتونونو د اداري سیسټم ډیجیټل کولو بهیر په همغږې توګه پرمخ ولاړ شي. همدارنګه دا پرېکړه هم وشوه، چې د روغتونونو او روغتیایي مرکزونو لپاره به ډیجیټلي سیسټم د مخابراتو وزارت جوړ کړي او لګښتونه به یې ماليې وزارت پرې کړي.
