د عامې روغتیا نوماند وزیر د غور ولایت څخه لیدنه وکړه
د عامې روغتیا وزارت نوماند وزیر ډاکټر احمد جواد عثماني، د خپلو ولایتي سفرونو په دوام د غور ولایت ته تللی او د دې ولایت روغتیایي حالت یې له نږدې ارزولی.
په دغه سفر کې ملي شورأ کې د غور او بادغیس ولایتونو استازو د عامې روغتیا نوماند وزیر ډاکټر احمد جوادعثماني سره ملتیا کوي، لومړی یې د یادو ولایتونو د ولایتي روغتونونو بېلابېلو څانګو روغتیایي خدمتونو وړاندې کول له نږدې وارزول کوم چې د روغتونونو اصلاحي پروژې لخوا ملاتړ کېږي.
ډاکټر عثماني له ارزونو وروسته وموندله چې روغتون له ډېرې مودې راهیسې د درملو له کمښت او د تدارکاتو سیستم له ستونزو سره مخ وؤ، نوپه همدې پار بدلونونو ته اړتیا ده، هغه اړوندو مسؤولینو ته لارښوونه وکړه چې د عامې روغتیا وزارت د درملو له مرکزي ګودام څخه دې یاد ولایت ته ژر تر ژره د اړتیا وړ درمل و لېږدوي تر څو د در ملو نشتون له امله د اړمنو ستونزې حل شي.
همدارنګه، ډاکټر عثماني د اصلاحي پروژې مسؤولینو ته لارښوونه وکړه چې دوی دې د تدارکاتو سیستم اصلاح او ښه کولو لپاره بدلونونه راولي ترڅو ټول روغتونونه چې د دې پروژې له لارې ملاتړ کېږي د درملو او طبي اړتیاوؤ له کمښت سره مخ نشي.
له بلې خوا، د عامې روغتیا نوماند وزیر ژمنه وکړه چې موږ به د غور ولایتي روغتون ته د مسلکي متخصصینو په ګمارلو، دې روغتون کې د ارتوپیدي عملیات سمبال او عملي کولو لپاره اړین او کوټلي ګامونه پورته کړو.
