د عامې روغتیا وزارت د مالي او اداري چارو مرستیال، ښاغلي ملا بخت الرحمن شرافت د هلمند مرکز لښکرګاه ښار کې د کتلوي معافیت د نوې ودانۍ پرانیسته ترسره کړه
په همدې موخه جوړو شویو مراسمو کې د عامې روغتیا وزارت د څارنې او پلټنې لوی رئیس ډاکتر عنایت الله عنایت، د هلمند مرستیال والي مولوي محمد نبي حماس، د یاد ولایت د عامې روغتیا رئیس مولوي فضلي احمد شفیع الله، د یونیسف استازو او ګڼ شمېر روغتیا پالانو ګډون کړی و.
د مالي او اداري چارو مرستیال یاده ودانۍ د ماشومانو د روغتیا خوندیتوب لپاره اغېزمن ګام وباله او زیاته یې کړه، چې د کتلوي معافیت خدمات به لا پیاوړي کړي، د واکسین لاسرسي برخه کې به لا ښه والی راولي او په ولسونو یې غږ وکړ، چې د هېواد د ابادۍ او پرمختګ لپاره ګډ کار وکړي؛ تر څو پر ځان بسیا او پرمختللی هېواد ولرو.
د عامې روغتیا وزارت د څارنې او پلټنې لوی، رئیس ډاکټر عنایت الله عنایت پر حفظ الصحې ټینګار وکړ او له ولسونو یې وغوښتل، چې خپلو ماشومانو ته وقایوي درمل او واکسین پر خپل وخت او زمان تطبیق کړي؛ تر څو د ساري ناروغیو مخه ونیول شي.
