د عامې روغتیا وزارت سرپرست د پکتیا ولایت استازو او مخورو سره وکتل
دوشنبه، غبرګولی ۱۰/۱۴۰۰
د عامې روغتیا وزارت سرپرست ډاکتر وحید مجروح، نن د پکتیا ولایت د خلکو له استازي ډاکټر یارباز حمیدي او په پارلمان کې د روغتیا او ځوانانو کمیسیو رئیس او د دې ولایت مخورو سره وکتل.
د پکتيا استازو د عامې روغتیا وزارت مشرتابه سره د دغه ولایت روغتیایي ننګونې شریکې کړې او د پکتیا ولایت کې د روغتیايي خدمتونو د ښه والي، د اکمال تخصص پروګرام رامنځته کول، د ولایتي روغتون ارتقأ او په ولایت کې د روغتیايي کارکونکو د زیاتوالي په برخه کې د دغه وزارت څخه د لا زیاتو همکاریو غوښتنه وکړه.
د عامې روغتیا وزارت سرپرست د دغه ولایت د روغتیایي ننګونو د اورېدو سربېره، د پکتیا ولایت د روغتیایي ننګونو د حل په پارله دوی سره د همکارۍ ژمنه وکړه.
ډاکټر مجروح وویل: ټاکل شوې ده چې د پکتیا ولایتي روغتون له ۱۵۰ نه ۲۰۰ بسترونو ته لوړ شي او د اکمال تخصص پروګرام به له اړتیاوؤ سره سم په دغه ولایت کې په لاره واچول شي.
ډاکتر مجروح، د هېواد په ټولو ولایتونو کې د روغتیايي خدمتونو د پرمختګ په اړه اشاره وکړه او ویې ویل: موږ هڅه کوو د ټولو ولایتونو روغتیایي ننګونو ته لاسرسی وکړو او د دغه وزارت په نوي طرحو کې ټول مهم موراد د هر ولایت د اړتیاوؤ پر اساس په عادلانه توګه پام کې نیول شوي دي.
