د عامې روغتیا وزارت له لوري د ایډز ناروغۍ پر وړاندې د مبارزې او عامه پوهاوي غونډه ترسره شوه
په همدې موخه جوړو شویو مراسمو کې د عامې روغتیا وزارت د مالي او اداري چارو مرستیال ښاغلي قاري عبدالولي صدیقي، یو شمېر مرکزي رئیسانو، د روغتیا نړیوال سازمان، UNDP، UNODC او د رسنیو استازو ګډون کړی و.
د عامې روغتیا وزارت د مالي او اداري چارو مرستیال ښاغلي قاري عبدالولي صدیقي د ایډز پر وړاندې د اغېزمنې مبارزې برخه کې د عامه پوهاوي پر پراختیا ټینګار وکړ او ویې ویل: د ا.ا.ا د عامې روغتیا وزارت ژمن دی، چې د روغتیا په ټولو برخو کې خلکو ته عادلانه، مؤثر او باکیفیته خدمات وړاندې کړي.
دغه راز، د وقایوي طب لوی رئیس ډاکټر حیدر خان حیدر د خپلې وینا په ترڅ کې وویل، د ایډز ناقله ناروغي په نړۍ کې د انسانانو لپاره لوی ګواښ دی او د مخنیوي لپاره یې باید ټول وقایوي تدابیر په پام کې ونیول شي او زیاته یې کړه، چې په دې اړه دې د عامه پوهاوي کچه لوړه او د تشخیص او درملنې خدمات دې پراخ شي.
همداراز، افغانستان کې د ساري ناروغیو (ایډز او هیپټایټس) د کنټرول ملي پروګرام مسؤل ډاکټر عبدالرحمن شیریندل د ایډز (HIV) پر وړاندې د مبارزې برخه کې د خپلو فعالیتونو او لاسته راوړنو په اړه معلومات وړندې کړل.
بل لور د روغتیا نړیوال سازمان او UNDP استازو هم د ایډز ناروغۍ د خطرونو او مخنیوي لارو چارو په اړه معلومات وړاندې کړل؛ ترڅو دغه خطرناکه ناروغي کنټرول او مخه یې ونیول شي.
