د عامې روغتیا وزیر، ښاغلي ډاکتر قلندر عباد په خپل کاري دفتر کې د دايکندي له والي، مولوي نجیب الله رفيع سره لیدنه ترسره کړه
په دې لیدنه کې په دایکندي ولایت کې د روغتیايي خدمتونو د پراخېدو ، د نویو روغتیايي مرکزونو جوړېدو او په دې ولایت کې د روغتیايي پرسونل د ظرفیت لوړونې اړوند بحث او خبرې ترسره شوې.
د عامې روغتیا وزیر، ښاغلي ډاکټر قلندر عباد د هېواد ټولو وګړو ته د روغتیايي خدمتونو رسول او د روغتیايي سیستم پیاوړتیا له خپلو لومړیتوبونو وباله او ویې ویل، په همدې موخه مو په تېرو څه باندې دوو کلونو کې د روغتیا په برخه کې د پام وړ لاسته راوړنې لرلې او په نورو ولایتونو کې د ګڼ شمېر نویو روغتیايي مرکزونو جوړېدو سربېره مو په دایکندي ولایت کې هم یو شمېر نوي روغتیايي مرکزونه جوړ کړي، چې اوس هم یاده لړۍ دوام لري.
د عامې روغتیا وزیر همداراز زیاته کړه موږ هڅه کوو، چې په کور دننه د خپل روغتیايي پرسونل ظرفیت لوړونې سربېره ګڼ شمېر روغتیايي کارکوونکي د معیاري طبي زده کړو او ظرفیت لوړولو په موخه بهرنیو هېوادونو ته واستوو او په دې برخه کې هڅې روانې دي.
له بل لوري د دایکندي والي د عامې روغتیا وزارت له مشرتابه څخه د هېواد په روغتیايي سکتور کې د وروستیو پرمختګونو او نویو روغتیايي مرکزونو د جوړېدو په موخه مننه وکړه او د هېواد روغتیايي سیستم د پیاوړتیا په برخه کې یې د نوموړي هڅې وستایلې.
