د عامې روغتیا وزیر په خپل کاري دفتر کې د جوړېدونکو سرطاني ناروغیو مرکزونو په هکله د وزارتونو له استازو او اړوند مسؤلینو سره ناسته ترسره کړه
په دې ناسته کې د عامې روغتیا وزارت د روغتیايي پراختیا او پالیسۍ مرستیال، ښاغلي ډاکټر محمد حسن غیاثي، د مالي او اداري چارو مرستیال، ښاغلي مولوي محمد اسحق صاحبزاده د وزارت مرکزي رئیسانو، د بهرنیو چارو، لوړو زده کړو او اټومي انرژۍ وزارتونو استازو شتون درلود، چې د سرطاني ناروغیو مرکزونو جوړېدو په موخه د لارو چارو د ترتیب لپاره د یوې کمېټې پر جوړېدو بحث او خبرې ترسره شوې.
په دغه ناسته کې د عامې روغتیا وزیر، ښاغلي مولوي نور جلال جلالي له لوري یوه کمېټه وټاکل شوه، چې په راس کې یې د پلان او پالیسۍ عمومي رئیس، ډاکټر میرویس احمدزی، د تشخیصیه خدماتو رئیس، د انکالوژي پروژې استازی، د بهرنیو چارو، لوړو زده کړو او اټومي انرژۍ وزارتونو استازي شتون لري؛ ترڅو په منظمه او اغېزمنه توګه د یادو مرکزونو د چارو پر مخ وړولو لپاره تخنیکي موضوعات وڅیړي او له تحلیل وروسته یې له اجنډا سره یو ځای بین الوزارتي کمیسیون ته وړاندې کړي.
