د عامې روغتیا پیاوړتیا پروګرام د دوهم پړاو زده کړیالانو فراغت غونډه تر سره شوه
د عامې روغتیا وزارت د روغتیا ملي انسټېټیوټ له لوري د امفنیټ-افکو مؤسسې په مالي او تخنیکي همکارۍ (۳۰) تنو د عامې روغتیا پیاوړتیا تر عنوان لاندې له یو شپږ میاشتني روزنیز پروګرام وروسته د فراغت سندونه تر لاسه کړل.
په همدې موخه جوړې شوې غونډه کې د عامې روغتیا وزارت د روغتیايي پراختیا او پالیسۍ مرستیال ښاغلي ډاکټر محمد حسن غیاثي، د مقام د دفتر لوی رئیس الحاج شیخ محمد طاهر حلیم، د وزارت مرکزي رئیسانو، د امفنیټ-افکو مؤسسې او د رسنیو استازو ګډون کړی و.
په دې غونډه کې د روغتیايي پراختیا او پالیسۍ مرستیال، فارغانو ته مبارکي وویله او زیاته یې کړه:(نن د هېواد د تاریخ او تحصیل له روښانه ورځو څخه یوه ورځ ده، هغه ورځ چې نه یوازې ستاسو درنو فارغالتحصیلانو او کورنیو لپاره د ژوند نوی څپرکی دی؛ تر څنګ یې زموږ د ګران هېواد افغانستان د روغتیايي نظام راتلونکي لپاره د هیلو یوه مهمه نښه هم ده).
ښاغلي مرستیال، فارغانو ته د نوې دندې، دروند مسؤلیت، سترو فرصتونو او روغتیايي ننګونو یادونه هم وکړه او له هغوی څخه یې وغوښتل، چې د خپلو زده کړو، لوړ تعهد، صداقت او د خلکو د خدمت په لاره کې بشپړې لېوالتیا سره د ناروغیو مخنیوي او د خلکو د روغتیايي وضعیت په ښه کولو کې له هېڅ ډول هڅو او کوښښونو درېغ ونه کړي.
همدارنګه، د عامې روغتیا وزارت د مقام د دفتر لوی رئیس، الحاج شیخ محمد طاهر حلیم فارغو شویو ډاکټرانو ته د مبارکۍ تر څنګ وویل:(نن موږ د مثبت تعامل پر لور په حرکت کې یو او د دې ډاکټرانو فراغت به زموږ سره د هېواد د روغتیايي سیستم په پیاوړتیا، وقایې، د ناروغیو په سم تشخیص، د معیاري څېړنو په ترسره کولو، غوره پلان جوړونې او د روغتیايي برخې د تشو (خلاوو) په ډکولو کې لا ډېره مرسته وکړي).
دغه راز، د افغانستان د روغتیا ملي انسټېټیوټ لوی رئیس ډاکتر تاج ملوک صمیم، د سیمه ییزې اپیډیمولوژي برنامې تخنیکي مشاور ډاکټر خواجه میر اسلام سعید، د امفنیټ–افکو مؤسسې د مرکزي دفتر استازي ښاغلي سیف الدین الهنداوي، د افغانستان لپاره د امفنیټ-افکو مؤسسې مسؤل عصمت الله هاشمي او د عامې روغتیا د پیاوړتیا پروګرام یو تن فارغ زده کړیال، په ټولنه کې د دې پروګرام د ارزښت، له ناروغیو سره د مبارزې، وقایې، معیاري څېړنو او د هېواد روغتیايي سیسټم د پیاوړتیا برخه کې د دغه ډاکټرانو د رول او اهمیت په اړه هر اړخیزې ویناوې تر سره کړې.
