ننګرهار سیمه ییز روغتون کې د تخصصي روزنیز پروګرام له پرمختګ څخه نظارت ترسره شو
د مرکزي او ولایتي تخصصي روغتونونو څخه د پرلپسې نظارتونو په لړ کې چې موخه یې په تخصصي برنامو کې ستونزو ته رسېدنه، په روغتونونو کې د یادې برنامې د ځانګړي کریکولم پلي کول او د تخصصي برنامو بډایه کول دي، دا ځل د عامې روغتیا وزارت اکمال تخصص عمومي ریاست نظارتي ټیم د ننګرهار سیمه ییز روغتون څخه لیدنه ترسره کړه.
د اکمال تخصص ریاست نظارتي ټیم چې د ننګرهار عامې روغتیا رئیس یې هم ملتیا کوله ، د یاد روغتون ټریني ډاکترانو او استادانو په شتون کې یې د عمومي جراحي، عمومي داخلې، نسایي ولادي، ماشومانو داخلې، عصابو جراحي، غوږ او ستوني، انتاني، انستیزي او نري رنځ درملنې څانګو څخه لیدنه وکړه.
د یاد نظارت موخه د اکمال تخصص برنامې معیاري کول او په دې برنامه کې شته ستونزو ته رسېدنه ده؛ ترڅو د اکمال تخصص برنامې د معیاري کولو او ټولنې ته د روزل شویو متخصصینو په وړاندې کولو سره هېوادوالو ته معیاري روغتیايي خدمات وړاندې کړي.
