په هېواد کې د اکسیجن کمښت د حل په پار د عامې روغتیا وزارت د مشرتابه هڅه
یکشنبه، چنګاښ ١٣/١٤٠٠
د عامې روغتیا وزارت سرپرست ډاکتر وحید مجروح، نن له لرې لارې د نړیوال بانک استازو سره په یوه ناسته کې، د اکسیجن د تولید دستګاه وؤ د پېرودلو په اړه بحث او خبرې وکړې.
د عامه روغتیا وزارت سرپرست، د اکسیجن د تولید اته دستګاه وؤ چې ټاکل شوې د نړیوال بانک لخوا وپېرودل شي د تدارکاتي پروسې پر ګړندي کولو باندې ټینګار وکړ او د نړیوال بانک څخه یې د تدارکاتو پروسې ګړندۍ کولو په پار د همکارۍ غوښتنه وکړه.
ډاکترمجروح، د اکسیجن کمښت د کورونا په درېیمې څپې کې د روغتیا سکتور یوه لویه ننګونه وبلله او ویې ویل چې موږ اوس د اکسیجن د تولید لس دستګاه وو ته جدي اړتیا لرو.
په ورته وخت کې په کابل کې د نړیوال بانک استازي ډاکتر حبیب احمدزي د عامې روغتیا وزارت سره د نړیوال بانک په همکارۍ ټینګار وکړ او ویې ویل چې په روغتیایي مرکزونو کې د اکسیجن د تولید دستګاه وؤ برابرول د نړیوال بانک له لومړیتونو څخه دي او موږ به د دې ستونزې د حل لپاره هڅه وکړو.
همدارنګه، په دغه ناسته کې، په افغانستان کې د کورونا واکسین برابرولو د څرنګوالي په اړه بحث وشو او د عامې روغتیا وزارت سرپرست د کورونا ویروس د مخنیوي یواځنۍ موثره لار د کورونا واکسین تطبیق کول وبلل او له نړیوال بانک څخه یې وغوښتل چې د کورونا واکسین د چمتو کولو په برخه کې د عامې روغتیا وزارت سره لا زیاته مرسته وکړي.
