ډاکټر کریمالله حلیمي د نیمروز د بېرته راستنېدونکو کمپ روغتیایي مرکزونه وڅارل
د عامې روغتیا وزارت د نظارت رئیس، ډاکټر کریم الله حلیمي نیمروز ولایت ته د سفر په ترڅ کې د AADA ، IOM او Relief International مؤسسو اړوند د بېرته راستنېدونکو کمپ له روغتیایي مرکزونو څخه نظارت تر سره کړ
یاد نظارت چې موخه یې په هېواد کې د روغتیایي خدمتونو کیفیت لوړل، هېوادوالو ته په معیاري توګه د روغتیايي خدمتونو وړاندې کول او چارو کې شفافیت دی، ترڅ کې یې ډاکټر کریم الله حلیمي او مل تخنیکي پلاوي د نیمروز ولایت د بېرته راستنېدونکو کمپ د روغتیایي مرکزونو له ټولو څانګو او امبولانس خدمتونو څخه لیدنه وکړه، ستونزې او نیمګړتیاوې یې په نښه او د حل په موخه یې له اړوندو مسؤلینو سره شریکې کړې.
د نظارت رئیس همداراز، د روغتیايي مرکزونو له مسؤلینو څخه وغوښتل، چې په مراکزو کې نورې څانګې هم فعالې کړي؛ ترڅو بېرته راستنېدونکو هېوادوالو ته باکیفیته او پر وخت خدمتونه وړاندې شي، هغه روغتیايي کارکوونکو ته هم سپارښتنې وکړې، چې له ناروغانو سره د غوره چلند سربېره هغوی ته ټول اړین روغتیايي خدمتونه وړاندې کړي.
