د مور په شیدو د تغذیې نړیوالې اونۍ په اړه د عامه پوهاوي غونډې د هېواد په مرکز او ټولو ولایتونو کې ترسره شوې
د ياده اونۍ په اړه د عامه پوهاوي غونډې چې هر کال د اګست له لومړۍ تر اوومې نېټې پورې ترسره کېږي، د عامې روغتیا وزارت د عامه تغذیې ریاست تر رهبرۍ لاندې په مرکز او ټولو ولایتونو کې ترسره شوې.
په دغو غونډو کې د مور په شیدو د ماشوم د تغذیې پر اهميت، ملاتړ او پراختیا ټینګار وشو او له میندو او کورنیو غوښتنه وشوه، چې ماشوم ته د زیږون په لومړي ساعت کې د مور شیدې ورکړي، تر شپږو میاشتو پورې یې یواځې د مور په شیدو تغذیه کړي او له شپږو میاشتو وروسته د مناسبو بشپړوونکو خوړو ترڅنګ تر دوو کلونو یا زیاتې مودې پورې د مور شیدو ته دوام ورکړي.
د عامې روغتیا وزارت مرکزي او ولايتي مسؤلينو د مور او ماشوم د تغذیې ښه والي په موخه پر ګډو هڅو ټینګار وکړ او له میندو، کورنیو، ټولنې، اړوندو ادارو او ملي او نړیوالو همکارانو یې وغوښتل، چې د مور په شیدو د تغذیې د ملاتړ او ترویج په برخه کې خپلو هڅو ته دوام ورکړي.
