د مرکز او ولایتونو ۱۵۰ تنو د سنتي طب طبيبانو د مسلکي ظرفیت لوړونې ښوونیز پروګرام ترسره شو
د عامې روغتیا وزارت د سنتي طبابت د چارو تنظیم ریاست په نوښت او د روغتیا نړیوال سازمان (WHO) په مالي ملاتړ، د مرکز او ولایتونو ۱۵۰ تنو د سنتي طب طبيبانو د مسلکي ظرفیت لوړونې ښوونیز پروګرام د ټاکل شویو ښوونیزو موضوعاتو له بشپړېدو وروسته پای ته ورسېد.
د عامې روغتیا وزارت د خوړو او درملو مرستیال، ښاغلي مولوي حمدالله زاهد د یاد پروګرام د پای مراسمو کې په هېواد کې د سنتي طبابت د بیا راژوندي کولو، پیاوړتیا او معیاري کولو پر اهمیت ټینګار وکړ او له ګډونوالو یې وغوښتل، چې د اړوندو معیارونو، مسلکي اصولو او نافذه مقرراتو په رعایتولو سره د سنتي طبابت د ودې او خدمتونو د کیفیت ښهوالي لپاره هڅې وکړي.
د دغه ښوونیز پروګرام موخه د سنتي طب د طبيبانو مسلکي ظرفیت لوړول، د اړوندو قوانینو او معیارونو په اړه د هغوی پوهاوی زیاتول، د سنتي طبابت د خدمتونو معیاري کول او د سنتي طب د طبيبانو او تنظیموونکو ادارو ترمنځ د همغږۍ پیاوړتیا وه.
