په هېواد کې د ملاریا ناروغۍ د مبارزې پروګرام د ارزونې په پار ناسته جوړه شوه
سه شنبه، وری ١٧/١٤٠٠
د عامې روغتیا وزارت د پالیسۍ او پلان مرستیال ډاکټر بشیر نورمل، په افغانستان کې د ګلوبل فنډ ادارې، د ملګرو ملتونو پراختیايي پروګرام استازو او په افغانستان کې د ملاریا برنامې له مالي او تخنیکي همکارانو سره د ویډیو کنفرانس له لارې د یوې ناستې په ترڅ کې د ملاریا ناروغۍ د مبارزې پر وړاندې د خدمتونو وړاندې کولو د څرنګوالي او په هېواد کې د دې ناروغۍ د کنټرول په اړه خبرې وکړې.
په دغه ناسته کې، ګډونوالو په هېواد کې د نري رنځ د کنټرول برنامې د پیاوړو او صعیفو ټکو په اړه چې د ترسره شویو ارزونو پر اساس پېژندل شوي دي بحث او د نظر تبادله وکړه او په راتلونکي کلونو کې د دې برنامې د پیاوړي کولو لپاره یې ځانګړي وړاندیزونه وکړل.
د عامې روغتیا وزارت د پالیسۍ او پلان مرستیال د ګلوبل فنډ ادارې او نورو مرستندویانو څخه په افغانستان کې د ملاریا برنامې د مالي او تخنیکي مرستو له امله مننه وکړه او په دې برخه کې د هېواد روغتیایي سکتور سره د دوی د لا همکارۍ غوښتنه وکړه.
له بلې خوا، ډاکټر نورمل وویل: په تېرو دوه کلونو کې په افغانستان کې د ملاریا ناروغۍ کنټرول له ټاکل شوي هدف او تمې څخه پورته دی او یوځل بیا یې د دې وژونکې ناروغۍ د ژر کنټرول لپاره د عامې روغتیا وزارت د مشرتابه له ژمنتیا خبر ورکړ.
