د ملالۍ زېږنتون روغتون کې د طبابت اخلاقو لومړۍ کمېټه جوړه شوه
یکشنبه، غویی ۱۴۰۰/۱۲
د عامې روغتیا وزارت سرپرست ډاکتر وحید مجروح، نن د ملالۍ زېږنتون روغتون کې د طبابت اخلاقو لومړنۍ کمیټې د پرانیستې په مراسمو کې ګډون او وینا وکړه.
د عامې روغتیا وزارت سرپرست د دې برنامې پلي کول د ناروغانو په وړاندې د ډاکترانو چلند بدلولو کې یو مهم ګام وګڼه او وې ویل: چې د طبابت اخلاق د روغتیا سکتور پر وړاندې د خلکو د رضایت اساسي بنسټ دی.
ډاکتر مجروح له ټولو روغتیایي کار کوونکو وغوښتل، چې د دې برنامې په پلي کولو، د طبابت د اخلاقو کلتور ته وده ورکولو، په ډاکټرانو او روغتیا سکتور باندې د خلکو باور د پیاوړي کولو لپاره دې د عامې روغتیا وزارت سره مرسته وکړي.
دغه راز ډاکتر مجروح زیاته کړه چې په پوره توان سره به په روغتونونو کې د روغتیایي کار کوونکو لپاره ټول امکانات او د اړتیا وړ اسانتیاوؤ د رامنځته کولو لپاره هڅه وکړم او زما تمه له تاسو څخه داده چې د خپلو هڅو ترڅنګ د طبابت اخلاق هم مراعت کړئ.
ډاکترمجروح ټینګار وکړ چې په روغتیایي مرکزونو کې داسې خلک هم شتون لري چې د ناروغ پر وړاندې خورا ښه او غوره چلند لري او چې دوی د روغتیا سکتور بېلګې او کړنې یې د ستاینې وړ دي.
په ورته وخت کې، د هېواد د طبي شورا رئیسې ډاکتر نسرین اوریاخیل د عامې روغتیا وزارت سره د دې شورا پر همغږي باندې ټینګار وکړ او زیاته یې کړه موږ هڅه کوو چې دغه برنامه د کابل په ټولو روغتونونو کې پراخه کړو او د ډاکترانو له چلند په ځانګړي توګه په روغتیایي مرکزونو او معاینه خانه کې د ناروغ پر وړاندې د دوی د چلند له ډول څخه څارنه کوو.
د طبي شورا رئیسې زیاته کړه: د دې برنامې سربېره، موږ د ډاکترانو د حقوقو، د ناروغانو حقونو او د روغتیایي کار کوونکو د امتیازاتو په تړاو د عامه پوهاوي برنامې تر لاس لاندې لرو، چې دغه برنامې په روغتیایي مرکزونو کې هم پیلېږي.
له بلې خوا، په طبي شورا کې د طبابت اخلاقو د څانګې مسؤول ډاکتر احمدشاه شکوهمند د طبي اخلاقو برنامې په لاره اچولو او پلي کولو کې د عامې روغتیا وزارت د مشرتابه له ملاتړ څخه مننه وکړه او وې ویل: موږ به په پوره توان سره هڅه وکړو چې د دې برنامې په پلي کولو سره د ناروغ پر وړاندې د روغتیايي کار کوونکو د چلند برخه کې یو ټولیز بدلون رامنځته کړو.
