د کنړ ولایت د شیګل ولسوالۍ په موڼي سیمه کې د یو روغتیایي مرکز پرانیسته تر سره شوه
د افغانستان اسلامي امارت د عامې روغتیا وزارت له لوري د کونړ ولایت شیګل ولسوالۍ په موڼي سیمه کې د ۵,۵ میلیونه افغانیو په لګښت د یو بنسټیز روغتیايي مرکز پرانیسته ترسره شوه.
په همدې موخه جوړو شویو مراسمو کې د عامې روغتیا وزیر، ښاغلي مولوي نور جلال جلالي، د مخابراتو او معلوماتي ټکنالوژۍ وزیر ښاغلي مولوي نجیب الله حیات حقاني د عامې روغتیا وزارت یو شمېر مرکزي رئیسانو، د کونړ مرستیال والي عبدالله حقاني، د کونړ د عامې روغتیا رئیس قاري مظفر خان مخلص، د تمویل کوونکې روغتیایي شبکې رئیس ډاکټر محمد نسیم نعیم، قومي مشرانو او روغتیایي کارکوونکو ګډون کړی و.
د عامې روغتیا وزیر، ښاغلي مولوي نورجلال جلالي موڼي سیمه کې د یاد روغتیایي مرکز جوړېدو ته په اشارې وویل: (د آبادۍ په لور یو قدم مختګ ستره لاس ته راوړنه ده او باید شکر یې ادا شي.)
ښاغلي وزیر همداراز زیاته کړه، د اسلامي امارت مشرانو په ملاتړ او سپارښتنه یې هڅه پیل کړې، چې د هېواد په ټولو سیمو کې د ولسوالۍ سطحې روغتونونه جوړ او روغتیايي سیستم پیاوړی کړو؛ څو روغتیایي خدماتو ته د ولسونو لاس رسی زیات، په مرکزي روغتونونو کې د ناروغانو شمېر راکم او روغتیايي سیستم معیاري او په دې برخه کې عصري کېدو ته زمینه برابره شي.
بل لور د کونړ ځایي اوسېدونکو، قومي مشرانو او مسئولینو له عامې روغتیا وزارت څخه مننه وکړه، چې روغتیایي برخه کې یې د دوۍ ستونزو ته په پاملرنې یو مجهز روغتیایي مرکز تر جوړېدو وروسته ګټې اخیستنې ته وسپاره.
