د بادغیس ولایت غورماچ ولسوالۍ کې د یو جامع روغتیايي مرکز د جوړېدو بنسټ ډبره کېښودل شوه
په همدې موخه جوړو شویو مراسمو کې د بادغیس والي، د عامې روغتیا رئیس، د UNHCR، یونیسف او "SAF" تطبیق کوونکې مؤسسې استازو، قومي مشرانو او د سیمې خلکو ګډون کړی و.
د یاد روغتیايي مرکز نوې ودانۍ د بادغیس عامې روغتیا ریاست په هلو ځلو او د UNHCR دفتر په مالي لګښت جوړیږي، چې ټول لګښت یې له ۵۰۰ زرو امریکايي ډالرو څخه ډېر اټکل شوی دی.
د بادغیس عامې روغتیا رئیس، مولوي خان محمد همت وویل: د دې مرکز په پرانیستلو سره به د غورماچ ولسوالۍ د خلکو روغتیايي ستونزې له ۷۰ سلنه څخه ډېرې حل شي، چې دا د روغتیايي خدماتو ښهوالي په لور په دې سیمه کې یو مهم ګام بلل کیږي.
د بادغیس عامې روغتیا ریاست له ملي او نړیوالو ادارو څخه د روغتیايي وضعیت ښهوالي په برخه کې د مرستو مننه وکړه او ټینګار یې وکړ، چې په دې ولایت کې به د نورو سیمو لپاره هم د روغتیايي خدماتو پراختیا هڅې روانې وي.
