د ا.ا.ا. د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني او مل پلاوي نیمروز ته د سفر په ترڅ کې له ولایتي روغتون څخه لیدنه وکړه

په دې لیدنه کې چې د نیمروز مرستیال والي یې ملتیا کوله، د روغتیايي خدمتونو وړاندې کولو مرستیال، ښاغلي مولوي عبدالولي حقاني د تخنیکي ټیم سره په ګډه د ولایتي روغتون بېلا بېلې څانګې ولیدې، ستونزې یې په نښه او د حل په موخه یې له روغتیایي مسئولینو او کارکوونکو سره شریکې کړې.

د روغتیايي خدمتونو وړاندې کولو مرستیال دغه راز، روغتیايي کارکوونکو ته د غوره خدمتونو وړاندې کولو په موخه لازمې سپارښتنې وکړې.

بل لور د نیمروز ولایتي روغتون مسئولینو او روغتیایي کارکوونکو، د روغتیایي خدمتونو وړاندې کولو مرستیال او مل پلاوي سفر له ورتګ څخه، چې موخه یې په یاد روغتون کې د خدمتونو ارزونه وه، مننه وکړه او هم یې د روغتیایي خدمتونو لا ښه والي اړوند یو شمېر  وړاندیزونه شریک کړل.

ښاغلي مرستیال ژمنه وکړه، چې امکاناتو ته په کتو به شریکو شويو وړاندېزونو ته د حل لاره پیدا کړي.